الهلال وصنداونز المباراة الاصعب
كعادة كل سنة وفي التوقيت دا بالتحديد بيبدا دوري ابطال افريقيا دوري المجموعات .. ١٦ فريق مقسمين على أربعة مجمموعات يصعد من كل مجموعة فريقين اتنين لدور التمنية وبعدها تكون المنافسة بخروج المغلوب من كورتين ذهاب واياب ..ونحن ك جمهور سوداني بتهمنا حاليا المجموعة الأولى الفيها بجانب الهلال والممريخ كل من الأهلي المصري وصنداونز الجنوب افريقي .. مجموعة زي ماقلنا قبل كده ابدا ماساهلة بالنسبة لانديتنا لانها بتضم افضل فريقين ففي السنوات الأخيرة ..وزيد على انو بنواجه الأفضل ف مستويات انديتنا في الفترة الأخيرة ابدا ما بتسر .. وفي اخر مشاركاتنا في الموسم الفات في دوري المجموعات الفريقين كل واحد منهم اتذيل مجموعتو بجدارة واستحقاق ..
بس نحن على امل انو يختلف الحال السنة دي والوضع يكون مختلف ونشوف أداء يشرفنا ويرفع راسنا .. ح أتكلم في الفيديو دا عن مباراة الهلال وصندوانز الجنوب افريقي ونشوف مع بعض شنو المطلوب مننا في الكورة دي وهل الهلال حا يقدر يطلع بنتيجة إيجابية ولا لا .. وهل صنداونز مازال ههو الفريق المخيف ولا الفريق مستواه متدني وممكن ناخد الدايرنو من المباراة ؟ كل دا واكتر في الفيديو بس قبل مانبدا كالعادة اللايك والشير والاشتراك في القناة .. ويلا للتفاصيل ... في الموسم الفات مجموعتنا كانت بتضم بجانب الهلال كل من مازيمبي وشباب بلوزداد وصنداونز .. وبرضو كانت الممباراة الأولى لينا. في المجموعة قدام الجنوب افريقي .. قدم الهلال في الكورة اياها أداء متميز وكان في تنظيم عالي وانضباط تكتيكي في كتير من أوقات المباراة .. رغم تأخر الهلال بهدف لكن الهلال كان ند قوي لصنداونز وبادلو الهجمات لحدي ما استغل خصمنا خطا دفاعي قاتل من المدافع اوتارا .. سجل منو الهدف التاني وقضي على عشم الهلال وقتها في ادراك التعادل .. خسرنا في اول كورة ٢ صفر وكان في تفاؤل انو الفريق ح يصحى في الجولات البعديها بي حكم المستوى الطيب الاتقدم في الكورة دي.. لكن دام احصل وباختصار لحدي ما انتهى دوري المجموعات ماقدرنا نحقق أي انتصار لا على ارضنا ولا حتى خارجه واتذيلنا المجموعة .. لكن دا شي بقى من الماضي رغم انو يمكن كانت في أسباب أدت لعدم ظهور الهلال بمستوى يرضو الجمهور العريض اهم الأسباب دي كانت تغيير الجهاز الفني وقتها والأسلوب العقيم الاتبعو زوران .. اما حاليا الفريق بيعيش استقرار فني كبير خصوصا انو المدرب المموجود حاليا يعتبر امتداد وتكملة لعمل المدرب السابق ريكاردو ..ببس مع كل دا دخل كشف الفريق عديد كبير من اللاعبين الممحترفين وحتى محليين .. ودا شي قد ياثر على الأداء بي حكم الفريق مازال في طور الاعداد ومحاولة خلق نوع من التجانس بين العناصر القديمة والجديدة ... واكيد المعسكر الاعدادي المقامم حاليا في جنوب افريقيا ح يساعد الممدرب في انو يعد اللاعبين بصورة تكون مقبولة عشان تظهر العناصر دي بمستوى فني كويس في اول كورة ..دوري المجمموعات دايما بحتاج نوعية لاعبين محددين .. لاعبين بتمتعوا بالخبرة وبالقوة البدنية وبالرغبة في الظهور المشرف وتقديم نفسهم بصورة طيبة للجمهور .. زيد على كده واهم شي.. الطموح .. لو مابتمتلك لاعبين عندهم الطموح وبس بيشاركو من اجل المشاركة اكيد ما ح تكون في نتائج .. واعتقد انو في بعض لاعبينن الهلال الحاليين عندهم الطموح دا .. المباراة الأولى دايما هي البتعكس ليك مدى القوة البيتمتع بيها الفريق وبتديك الشكل الفني الحا يلعب بيهو المدرب في باقي المباريات .. اذا كان الأداء قوي والشكل الفني مطمن في الكورة دي حتى لو الفريق خسر حا يقدر يرجع في باقي المباريات وينافس على بطاقتي الصعود .. اما لو الأداء كان سيئ وكمان النتيجة سيئة ف دا حا ينعكس بشكل كبير على الممباريات البعديها .. لانو نحن دايما بنلعب على الجانب المعنوي اكتر من الجانب الفني وكل ما كانت الممعنويات مرتفعة ح نشوف أداء رفيع.... اما لو حصل العكس فما محتاج أقول ليك ..فريق صنداونز في السنوات الأخيرة منافس قوي على البطولة ودايما موجود في المربع الذهبي ومستواهم الفني شبه ثابت . صح ما زي قبل تلاته او اربع سنوات بس مازالو بنافسوا وعندهم الرغبه والطموح في انهم ياخدو الكاس .. ومن هنا بتجي صعوبة الممباراة رغم قناعاتي الشخصية انو فرقنا بتلعب احسن مع الافارقة ومابنشوف الرهبة الخوف البنشوفه قدام الفرق العربية ..عشان كده احتمالية نحقق نتيجة إيجابية تبقى احتمالية واردة ..وكونو نبدا بصندوانز انا شايف انو احسن من كنا نبدا بالاهلي المصري ...عناصر فريق الهلال الموجودين حاليا افضل بكتير من العناصر الكانت موجودة في الموسم الفات خصوصا المحترفين الأجانب .. عبدول وفييري متوقعين ممنهم ييحققوا الإضافة الممطلوبة مع الفريق ويقدموا ممستويات ترضي الجمهور وتساعد في تحقيق النتائج الإيجابية ..لكن نحن ماح نعلي سقف طموحاتنا ابدا عشان بعدين السقف دا مايقع فينا زي كل مرة ف حا ناخد كل كورة بواقعية .. كورتنا قدام صنداونز هي بي كل المقاييس كورة صعبة بحكم انو ببنلعب خارج ارضنا وهي اول كورة برضو في المجموعة ... زيد على كده وجود عناصر بتشارك مع الفريق لاول مرة .. بس الحاجة الاهم من دا كلو هو انو الفريق من فترة طويلة بعيد عن اللعب التنافسي ومهما كانت المباريات الودية قوية وقدام فرق كبيرة برضو ما زي التنافس الرسمي .. دورينا للأسف الشديد غير انو ضعيف وابدا الفرق الموجودة ففيهو ما مقياس كمان لسه ياداب بادي.والهلال مالعب ولا كورة في الدوري . ودي طبعا مشكلة اكيد لمن تكون واقف من اللعب الدوري فترة طويلة ف دا ببيضر بالفريق وبي شكلو الفني المابكون واضح وبيخلي المدرب ماقادر يوصل لقرار نهائي في التشكيل واختيار العناصر ..عشان كده بنشوف مدربين كتيرين لمن يتختو في موقف زي دا بيحاولو يكونوا في السيف سايد ومايلعبوا بالعناصر الجديدة وبيفضلوا اللعب ببعناصر الفريق القديمة .. العناصر البينا في انسجام وتفاهم والحاجه دي دايما الجمهور بكون رافض ليها .. لانو دايما دايرين يشوفو اللاعبين الجدد مشاركين لانهم ملو من العناصر القديممة دي وشايفين انهم ماعندهم شي يقدموه ... بس في النهاية دي امنيات جماهير واكيد الجهاز الفني هو الادري بالفريق وهو الادري باللاعبين الجاهزين .. وزي ما الهلال حا يحاول يطلع بي مكاسب من الكورة دي ماننسى برضو صنداونز عندو نفس الرغبة ةوالطموح وحا يحاول يبعد نفسو من أي حسابات تضر مسيرتو لي قدام في البطولة .. وهدفو الأول هي التلاته نقاط وعلى اسوا الفروض بالنسببة ليهم التعادل .. فريق بيلعب الكورة الحديثة الممرحلة والسريعة ودايما ببيستخدموا الأطراف بصورة مثالية جدا .. واللي هي على عكسنا تماما بتكمن مشكللتنا الكبيرة. في. اطراففنا .. في السنوات الأخيرة اطراف الهلال هي المشكلة وخصوصا الطرف اليمين من وقت طويل جدا ماشفنا لاعب قدر يسد الخانة ويساعد الفريق هجوميا ... سمؤال في اليمين او حتى فارس في الشممال رغم اجتهادهم الكبير بس ما مقنعين ابدا .. وكل النكبات خليني أقول بتجي من اطراف ملعبنا .. واعتقد حا تظل المشكلة دي قايمة في الموسم دا لانو للأسف ماتمت الإضافات الكنا متوقعنها واختيارات مجلس الإدارة كانت انها تدعم الوسط والهجوم . . واهملت الأطراف الدفاعية ..مع انو تمت إضافة السنغالي مؤخرا بس غالبا حا يتم الغاء التعاقد معاه بي سبب تحديد عدد المحترفين بعدد خمسة و صح تم تسجيل حسن متوكل في الطرف الشمال بس صعب نشوفو بيبدا محل فارس ودا لسبب واحد وهو عدم وجود الخبرة الكافية .. لكن مع دا كلو نحن ك جمهور دايما بنكون متفائلين وعندنا امل في الفريق ومهمتنا في الأول وفي الاخر هي التشجيع .. كل الامنيات بتحقيق نتيجة إيجابية تكون خير بداية للبطولة وتدينا الدافع لي باقي المباريات .. دا كان فيديو الليلة ياريت تكتب لي رايك وتوقعك لمباراة الجمعة وهل الهلال قادر يطلع بنتيجة إيجابية ولا انت شايف انها صعبة ؟ وبرضو ماتنسيى اللايك والشير والاشتراك في القناة .. في اممان الله